۸صبح، کابل: د روغتیا نړیوال سازمان (WHO) اعلان کړی چې د افغانستان په شمال کې د وروستۍ زلزلې په پایله کې لږ تر لږه ۲۰ کسان مړه او ۸۶۳ نور ټپیان شوي دي.
نوموړي سازمان سهشنبه د لړم پر ۱۳مه راپور ورکړی چې په سمنګان کې ۱۱ کسان مړه او ۲۷۹ ټپیان او په بلخ کې بیا ۹ کسان مړه او ۵۹۳ ټپيان ثبت شوي دي.
د راپور له مخې، د څه باندې ۴۰۰ ټپيانو درملنه بیا د بلخ په خصوصي روغتونونو کې شوې ده.
ملګرو ملتونو زیاته کړې چې په دغو ولایتونو کې څو روغتیايي مرکزونه هم اغېزمن شوي او په سمنګان کې بیا د ولایتي روغتون ازمایښت خونه نړېدلې او حیاتي روغتیايي تجهیزات یې تخریب شوي دي.
نوموړی سازمان وايي چې په دواړو ولایتونو کې بېړنۍ پاملرنه دوام لري او روغتیايي ډلې، ژغورنډلې او بشردوستانه بنسټونه د بېړنیو مرستو او د ټپيانو درملنې لپاره بسیج شوې دي.
د روغتیا نړیوال سازمان اعلان کړی چې له ځايي روغتیايي ادارو سره په همغږۍ د زیانونو پر ازونې، بېړنیو تجهیزاتو پر وېش او زلزله ځپلو ته د روغتیايي خدماتو له دوامه پر ډاډ بوخت دي.
