۸صبح، کابل: د کډوالو په چارو کې د ملګرو ملتونو عالي کمېشنرۍ (UNHCR) اعلان کړی چې افغان راستنېدونکي له بل مهاله ډېر بشرپالو مرستو او حیاتي ملاتړ ته اړتیا لري.
نوموړي سازمان یکشنبه د چنګاښ پر ۲۸مه په اېکس کې لیکلي چې په افغانستان کې د سرحدي بېړنیو مرستو د ځواب ویلو له پروګرامونو څخه د امریکا د اسلامي مرستو بنسټ (Islamic Relief USA) له ملاتړ او همکارۍ مننه کوي.
ملګرو ملتونو زیاته کړې چې دا ملاتړ افغان راستنېدونکو ته د ژوند ژغورونکو خدماتو، د زیانمنو کسانو د خوندیتوب، بېړنیو مرستو او نورو اړینو خدماتو د وړاندې کولو زمینه برابروي.
د کډوالو په چارو کې د ملګرو ملتونو عالي کمېشنرۍ ټینګار کړی چې دا مرستې په داسې وخت کې برابریږي چې افغان راستنېدونکي تر بل هر وخته ډېر بشري مرستو او ملاتړ ته اړتیا لري.
په وروستیو میاشتو کې له ګاونډیو هېوادونو څخه د افغان کډوالو د بېرته ستنېدو له زیاتېدو سره هممهاله، مرستندویه بنسټونو په وار وار د لارو په اوږدو کې د بشري اړتیاوو د زیاتېدو او له راستنېدونکو سره د مرستو او ملاتړ د دوام پر اړتیا ټينګار کړی دی.
