۸صبح، کابل: د ملګرو ملتونو د ښځو څانګې (UN Women) ویلي چې په افغانستان کې ښځې او نجونې عدالت ته له لاسرسي او برابرو حقونو محرومې دي.
نوموړي بنسټ سهشنبه د وږي پر ۳مه په اېکس پاڼه کې لیکلي چې د طالبانو له واکمنېدو پنځه کاله وروسته د افغانستان نیمایي وګړي قانون او عدالت ته د لاسرسي له پلوه د نیمایي نورو پرتله له کمو حقونو برخمن دي.
د ملګرو ملتونو د ښځو څانګې زیاته کړې چې دا په افغانستان کې د ښځو او نجونو د ژوند واقعیت دی او هغوی لا هم د خپلو حقونو او ازادیو په برخه کې له پراخو محدودیتونو سره مخ دي.
دغه بنسټ شته ننګونو او محدودیتونو ته په اشارې، د قانون پر وړاندې د ښځو د برابرۍ پر ارزښت ټینګار کړی دی.
مخکې هم د ملګرو ملتونو د ښځو څانګې پر افغان ښځو او نجونو د لګېدلو محدودیتونو په اړه اندېښنه څرګنده او هغوی ته یې د برابرو حقونو د ډاډمنېدو غوښتنه کړې وه.
