۸صبح، کابل: د روغتیا نړیوال سازمان (WHO) ویلي چې افغانستان لا هم په نړۍ کې له هغو دوو هېوادونو یو دی چې پولیو ویروس پکې په بومي بڼه پاتې دی.
نوموړي سازمان جمعه د چنګاښ پر ۱۹مه راپور ورکړی چې په افغانستان کې د پولیو ویروس بشپړ له منځه وړل پایدارې پانګونې، د روغتیايي خدماتو پیاوړتیا او د واکسیناسیون پروګرامونو پراختیا ته اړتیا لري.
د راپور له مخې، د نړیوالې بودیجې کمښت او د افغانستان پر روغتیايي نظام د فشار زیاتوالي، روغتیايي خدمات او د واکسیناسیون پروګرامونه له ننګونې سره مخ کړې دي.
د روغتیا نړیوال سازمان د بنسټیزو روغتیايي خدماتو پر خوندیتابه، د نړیوالې بودیجې د کمښت په شرایطو کې د واکسیناسیون پروګرامونو پر پیاوړتیا او په وروستیو کالو کې د ترلاسه شویو مهمو روغتیايي لاسته راوړنو پر ساتلو ټينګار کړی دی.
د روغتیا نړیوال سازمان د ختیځې مدیترانې سیمهییزې مشرې حنان بلخي ویلي چې په افغانستان کې د پولیو له منځه وړل د لومړنیو روغتیايي خدماتو له پیاوړتیا او د روغتیا په برخه کې د پانګونې له دوام سره تړاو لري.
هغې او مل پلاوي یې کابل او کندهار ته د سفر په ترڅ کې د ملګرو ملتونو له شریکانو، مرستندویه بنسټونو او روغتیايي کارکوونکو سره لیدلي او د واکسیناسیون د پراخولو، په ځانګړې توګه هغو ماشومانو ته چې تر اوسه نه دي واکسین شوي، د واکسین رسولو په اړه یې ورسره خبرې کړې دي.
