۸صبح، کابل: ملګري ملتونه وايي چې د افغانانو د راستنېدو کمساری بهیر، بېړنیو بشردوستانه مرستو او د نړیوالې ټولنې دوامدار ملاتړ ته اړتیا لري.
نوموړي سازمان چهارشنبه د چنګاښ پر ۱۷مه په خپرې کړې خبرپاڼې کې لیکلي چې د ملګرو ملتونو د پراختیايي پروګرام (UNDP) رییس الکساندر ډيکرو او د کډوالو په چارو کې د ملګرو ملتونو عالي کمېشنر برهم صالح له نړیوالې ټولنې غوښتي له افغانستانه خپل ملاتړ ته دوام ورکړي.
د خبرپاڼې له مخې، له ۲۰۲۳ کال څخه تر اوسه څه باندې شپږ میلیونه افغانان هېواد ته راستانه شوي او یوازې د روان میلادي کال له پیله څه باندې ۹۰۰ زره کسان افغانستان ته راغلي دي.
ملګرو ملتونو زیاته کړې چې د اټکل له مخې به د ۲۰۲۶ کال تر پایه شاوخوا ۲.۶ میلیونه نور افغانان هم هېواد ته راشي.
یاد بنسټ خبرداری ورکړی چې د نړیوالو مرستو کمښت او د نړیوالې ټولنې پيکه پاملرنه به د بېوزلۍ او بېځایه کېدو ګواښ پراخ کړي او د افغانستان نازکې لاسته راوړنې به وننګوي.
د ملګرو ملتونو دغو دوو جګپوړو چارواکو افغانستان ته د خپل سفر په ترڅ د بشردوستانه مرستو پر دوام، د کاري بوختیاو پر رامنځته کولو او د راستنو شویو له بیا ادغام څخه پر ملاتړ ټينګار کړی دی.
