۸صبح، کابل: د ملګرو ملتونو د ښځو څانګې (UN Women) ویلي چې په راتلونکي یو کال کې یې له شاوخوا یو زرو ۵۰۰ افغان متشبثو ښځو د ملاتړ لپاره ۱.۷ میلیونه ډالر ځانګړي کړي دي.
د ملګرو ملتونو د ښځو څانګې دوشنبه د تلې پر ۶مه راپور ورکړی چې دا پانګونه د ملګرو ملتونو له پراختیايي پروګرام سره د یو ګډ نوښت په چوکاټ کې کېږي.
د دغه پروګرام له مخې، متشبثې ښځې به له مالي ملاتړ او کاروبارونو د پراختیا له خدماتو برخمنې شي.
په دغه پروګرام مالي او ډيجیټلي سواد، سلامشورې، کاروبار ته پلان جوړول او بازارونو ته د لاسرسي ملاتړ هم شامل دی.
د ملګرو ملتونو د ښځو څانګې ویلي چې دا نوښت به په غیرمستقیم ډول له څه باندې ۱۴ زرو کسانو سره د سوداګرۍ د پیاوړتیا، د کورنیو د عوایدو د زیاتوالي او اقتصادي فعالیتونو د پراختیا په برخو کې مرسته وکړي.
