۸صبح، کابل: په افغانستان کې د ملګرو ملتونو د سرمنشي مرستیال استازی برونو لمارکي وايي چې سختې وچکالۍ، د اوبو د سرچینو مدیریت، له ایران او پاکستانه د کډوالو پراخې راستنېدنې او له پاکستان سره د دروازو تړل د افغانستان په سویل کې مهمې ننګونې دي.
لمارکي سهشنبه د تلې پر ۱۴مه ویلي چې په تېر یو یونیم کال کې د نړیوالو مرستو کمېدو ترڅنګ دغو ننګونو پر ځايي ټولنو فشار ډېر کړی دی.
نوموړي زیاته کړې چې په هلمند او کندهار کې بڼوال وايي له بدیلو محصولاتو لکه انګورو، انارو او غنمو ترلاسه کېدونکی عاید د کوکنارو له عاید سره د پرتلې وړ نه دی؛ په ځانګړې توګه هغوی چې د بدیل معیشت له ملاتړو پروګرامونو برخمن شوې نه دي.
د لمارکي په خبره، ځینو کروندګرو ویلي چې که محرومیت دوام ومومي او اړین ملاتړ ونه شي، ښایي بېرته د کوکنارو کرکېلې ته مخه کړي.
نوموړي ټینګار کړی چې نړیواله ټولنه دې افغانان یوازې نه پرېږدي؛ ځکه د نړیوالو مرستو کمښت په دغه هېواد کې د خلکو پر وضعیت، په ځانګړې توګه په کندهار او هلمند کې پام وړ اغېز کړی دی.
