۸صبح، کابل: د ملګرو ملتونو د بشري استوګنې پروګرام (UN-Habitat) د افغانستان په بېلابېلو سیمو کې د زیربناوو پر پیاوړتیا ټينګار کړی دی.
نوموړي بنسټ سهشنبه د وږي پر ۱۰مه په اېکس پاڼه کې لیکلي چې د خلکو د اړتیاوو پېژندلو او زیربناوو د ښه کولو لپاره له افغانانو سره نږدې همکاري کوي.
د ملګرو ملتونو د بشري استوګنې پروګرام ټينګار کړی چې د بنسټيزو خدماتو او زیربناوو ښه کول یې په افغانستان کې مهمه موخه ده.
دغه سازمان زیاته کړې چې د بنسټيزو خدماتو او زیربناوو پیاوړتیا د خلکو د ژوند په ښه کولو او له ستونزو سره د مبارزې په برخه کې یې له وړتیا سره مرسته کوي.
دا په داسې حال کې ده چې د افغانستان ګڼې سیمې د مناسبو زیربناوو له ننګونو او وګړي یې اړینو خدماتو ته د لاسرسي له ستونزو سره مخ دي.
