۸صبح، کابل: په افغانستان کې د ملګرو ملتونو له نشهيي او جرمونو سره د مبارزې دفتر (UNODC) ویلي چې په دغه هېواد کې د انساني قاچاق ګواښ د بشري او اقتصادي بحران په سختېدو زیات شوی دی.
نوموړي دفتر یکشنبه د زمري پر ۱۱مه په اېکس کې لیکلي چې د ټولنیزو و اقتصادي فشارونو له امله د انساني قاچاق، استثمار او جبري کار پر وړاندې د خلکو د زیانمنېدو کچه زیاته شوې ده.
د ملګرو ملتونو دغه بنسټ د څه باندې شپږو میلیونو افغانانو بېرته ستنېدل، د بدیل معیشت فرصتونو له برابرولو پرته د کوکنارو د کښت له منځه وړل او د ښځو پر حقونو سخت محدودیتونه په افغانستان کې د انساني قاچاق د خطر د زیاتېدو مهم لاملونو بللي دي.
له دې مخکې د ملګرو ملتونو د کډوالۍ سازمان (IOM) هم په افغانستان کې د انساني قاچاق د ګواښ له زیاتېدو خبرداری ورکړی و.
د نوموړي سازمان په خبره، له ایران او پاکستانه میلیونونه راستنېدونکي د بېوزلۍ، د کاري بوختیاوو د کمښت او بنسټيزو خدماتو د نشتوالي له کبله د انساني قاچاق، استثمار او ناوړه ګټه اخیستنې له ګواښ سره مخ دي.
