۸صبح، کابل: د کډوالۍ نړیوال سازمان (IOM) خبرداری ورکړی چې افغان راستنېدونکو ته د اړینو فرصتونو نشتوالی کولی شي هغوی د انساني قاچاق او ناوړه ګټې اخیستنې له ګواښ سره مخ کړي.
د کډوالۍ نړیوال سازمان پنجشنبه د زمري پر ۸مه د انساني قاچاق پر وړاندې د مبارزې نړیوالې ورځې په مناسبت ویلي چې افغانستان ته د راستنېدونکو کچه لوړه ده او له پراخ نړیوال ملاتړ پرته یې مدیریت ګران دی.
په افغانستان کې د کډوالۍ نړیوال سازمان د ماموریت مشر میهیونګ پارک ویلي چې ګڼ شمېر راستنېدونکي له محدودو امکاناتو سره راستانه کېږي او د ژوند د برابرولو فرصتونو، استوګنې او بنسټیزو خدماتو ته د لاسرسي په برخه کې له جدي ستونزو سره مخ دي.
نوموړي زیاته کړې چې په کور دننه د دوامدارو فرصتونو په نشتوالي سره ښايي خلک خطرناکو او ناقانونه سفرونو ته مخه کړي چې دا هغوی د انساني قاچاق، د کډوالو قاچاق، استثمار او ناوړه ګټې اخیستنې له ګواښ سره مخ کوي.
یاد بنسټ ټينګار کړی چې له راستنېدونکو او کوربه ټولنو ملاتړ یوازې بشردوستانه اړتیا نه ده، بلکې د افغانستان له ټيکاو سره مرسته هم ګڼل کېږي.
