۸صبح، کابل: د ملګرو ملتونو د بشري استوګنې پروګرام (UN-Habitat) ویلي چې په افغانستان کې میلیونونه کسان د څښلو پاکو اوبو ته له لاسرسي محروم دي.
نوموړي بنسټ سهشنبه د چنګاښ پر ۲۳مه په اېکس کې لیکلي چې د څښلو پاکو اوبو ته لاسرسی په افغانستان کې جدي ننګونه ده او میلیونونه وګړي د دغې حیاتي سرچینې له کمښت سره مخ دي.
د ملګرو ملتونو دغه بنسټ ټينګار کړی چې د ښاري پلان جوړونې او اغېزمن مدیریت په برخه کې پانګونه کولی شي د څښاک پاکو اوبو لاسرسی پراخ کړي، روغتیايي خدمات ښه کړي او راتلونکو نسلونو ته د اوبو سرچینې خوندي وساتي.
افغانستان په وروستیو کالو کې د اقلیمي بدلونونو، پرلپسې وچکالۍ، د نفوس زیاتوالي او د مناسبو بنسټیزو تاسیساتو د کمښت له امله، د څښلو پاکو اوبو د برابرولو په برخه کې له ستونزو سره مخ دی.
