۸صبح، کابل: د ملګرو ملتونو د بشري استوګنې پروګرام (UN-Habitat) وايي، د هرات ولایت په زندهجان ولسوالۍ کې څه باندې ۱۰۰ کورنیو د لمریزې برېښنا په مټ د اوبو رسونې شبکې له لارې د څښاک اوبو ته لاسرسی موندلی دی.
دې ادارې دوشنبه د لړم پر ۱۱مه، پر اېکس لیکلي چې دغه کورنۍ تر دې مخکې د څښاک اوبو ته د لاسرسي په برخه کې له ستونزو سره مخ وې.
د ملګرو ملتونو د بشري استوګنې پروګرام زیاته کړې چې دغه شبکه د جاپان د نړیوالې همکارۍ د ادارې (جایکا) په ملاتړ جوړه شوې ده.
په افغانستان کې د پاکو او سالمو څښاک اوبو ته لاسرسی لا هم د کورنیو له اساسي ستونزو ګڼل کېږي.
دا په داسې حال کې ده چې ملګرو ملتونو تر دې مخکې په افغانستان کې د اوبو د ناورین د پراخېدو په اړه خبرداری ورکړی و.
ملګرو ملتونو د راپور له مخې، اقلیمي بدلون، د اوبو د تقاضا زیاتوالی، د مالي سرچینو کمښت، له ځمکې لاندې اوبو په پراخه کچه ګټه اخیستنه او د اوبو د سرچینو ناسم مدیریت په دغه هېواد کې د اوبو ناورین لا پسې سخت کړی دی.
