۸صبح، کابل: د کډوالۍ نړیوال سازمان (IOM) وايي چې د اروپايي ټولنې په ملاتړ د ننګرهار سره رود ولسوالۍ په بالاباغ کلي کې نږدې ۳۰۰ کورنیو د څښلو پاکو اوبو ته پایداره لاسرسی موندلی دی.
نوموړي بنسټ یکشنبه د چنګاښ پر ۲۱مه راپور ورکړی چې پاکو اوبو ته لاسرسی وګړي ځواکمنوي او د ژوند کیفیت یې ښه کوي.
د راپور له مخې، له دغې پروژې وړاندې ډېرو کورنیو کورونو ته نږدې د اوبو سرچینو ته لاسرسی نه لاره او ښځې او ماشومان د اوبو برابرولو لپاره ناچاره و اوږد واټن پلی مزل وکړي.
د کډوالي نړیوال سازمان زیاته کړې چې د اوبو کمښت د دغه کلي د اوسېدونکو ژوند له جدي ننګونو سره مخ کړی و.
نوموړي سازمان ویلي چې د ښځو لپاره د اوبو ترلاسه کولو ځای هم جوړ شوی څو وکړای شي په اسانۍ ډېرو اوبو ته لاسرسی ولري او نور مجبوره نه وي چې د اوبو برابرولو لپاره اوږد واټن ووهي.
