۸صبح، کابل: د کډوالو په چارو کې د ملګرو ملتونو عالي کمېشنر برهم صالح او د ملګرو ملتونو د پراختیایي پروګرام رئیس الکساندر ډيکرو له طالب چارواکو سره په کتنه کې د نجونو او ښځو د بنسټیزو حقونو د ورکړې غوښتنه وکړه.
د ملګرو ملتونو پراختیایي پروګرام چهارشنبه د چنګاښ پر ۱۷مه په یو راپور کې اعلان وکړ چې د ملګرو ملتونو دغو دوو چارواکو د کورنیو پر پایښت، د ټولنو پر ثبات او د افغانستان په اوږدمهالې رغونه کې د ښځو او نجونو پر رول ټینګار کړی دی.
د هغوی په وینا ښځې او نجونې د کورنیو په پیاوړتیا، ټولنیز ثبات او د افغانستان د پرمختګ په بهیر کې بنسټیز رول لري.
د ملګرو ملتونو دغو دوو جګپوړو چارواکو همداراز د افغانستان په ټولنیز او اقتصادي ژوند کې د ښځو پر بشپړې ونډې ټینګار وکړ او د بشري مرستو د ښځینه کارکوونکو د فعالیت د زمینې د برابرېدو غوښتنه یې وکړه.
هغوی زیاته کړې چې د بشري حقونو ښځینه کارکوونکې باید وکولای شي ښځو او نجونو په ځانګړې توګه بېرته راستنو شویو ښځو ته لاسرسی ولري او د مرستو رسولو په بهیر کې د هغوی ملاتړ وکړي.
په ۲۰۲۱ کال کې د طالبانو له واکمنېدو وروسته په افغانستان کې د نجونو او ښځو پر زدهکړو، کار او ټولنیز حضور پراخ بندیزونه لګول شوي دي.
ملګرو ملتونو او د بشري حقونو بنسټونو په وار وار د دغو بندیزونو د لغو کېدو او په ټولنه کې ښځو ته د ونډې اخیستو د زمینې برابرولو غوښتنه کړې ده.
