۸صبح، کابل: د روغتیا نړیوال سازمان (WHO) اعلان کړی چې د نورستان په مرکز پارون کې له سېلابونو وروسته ۶ زرو او ۸۱۴ کسانو ته د اوبو له لارې د رامنځته کېدونکو ناروغیو د مخنیوي او د روغتیايي لارښوونو د پاملرنې اړوند عامه پوهاوی ورکړل شوی دی.
نوموړي سازمان پنجشنبه د زمري پر ۲۹مه په اېکس پاڼه کې لیکلي چې دغو کسانو د روغتیايي معلوماتو او عامه پوهاوي د پروګرامونو له لارې اړینو معلوماتو ته لاسرسی موندلی دی.
د روغتیا نړیوال سازمان ویلي چې په دغو پروګرامونو کې د پاکو اوبو د کارولو، روغتیايي خوندیتوب، چاپېریالي حفظالصحې او د اوبو له لارې د رامنځته کېدونکو ناروغیو د مخنیوي په اړه معلومات ورکړل شوي دي.
د دغه بنسټ په خبره، د عامه پوهاوي ۳۲ جلسې ترسره او څلور زره او ۵۰۰ معلوماتي کڅوړې هم وېشل شوې دي.
د روغتیا نړیوال سازمان زیاته کړې چې دا پروګرامونه د اروپايي ټولنې د بشري مرستو د ادارې په ملاتړ ترسره شوي دي.
ملګري ملتونه وایي، د دغو پروګرامونو موخه له خلکو سره د روغتیايي خوندیتوب په برخه کې مرسته او په افغانستان کې د ساري ناروغیو د خپرېدو کمول دي.
