۸صبح، کابل: د ملګرو ملتونو پراختیايي پروګرام (UNDP) وايي چې له ۲۰۲۲ کاله تر اوسه په افغانستان کې څه باندې ۸.۳ میلیونه وګړي د دغه بنسټ له پراختیايي پروګرامونو برخمن شوي دي.
نوموړي بنسټ دوشنبه د لړم پر ۱۸مه ویلي چې د ابادۍ (ABADEI) پروژې له لارې یې له ۲۸ زرو ۶۰۰ کوچنیو او متوسطو کاروبارونو ملاتړ کړی دی.
د ملګرو ملتونو پراختیايي پروګرام زیاته کړې چې څه د پاسه ۶۴ زره کاري بوختیاوې برابرې شوې چې ۵۱ زره یې ښځو ته ځانګړې دي.
دغه بنسټ ټينګار کړی چې دا پروګرام د اروپايي ټولنې او جاپان په ملاتړ پلی کېږي.
د جاپان د نړیوالو همکاریو اژانس (JICA) او د ملګرو ملتونو ځانګړی وجهي صندوق (STFA) هم د دغه پروګرام همکاران دي.
