۸صبح، کابل: ملګرو ملتونو د ښوونکي د نړیوالې ورځې په مناسبت د نړۍ په کچه د راتلونکو نسلونو د روزنې لپاره د ښوونکو د هڅو او ژمنتیا ستاینه کړې ده.
دغه سازمان دوشنبه د تلې پر ۱۳مه، په یوه پیغام کې ویلي چې ښوونکي د نویو نسلونو د راتلونکي په جوړولو کې مهم رول لري او بايد د هغوی د هڅو ملاتړ او ستاینه شي.
په افغانستان کې د ښوونکي نړیواله ورځ په داسې شرایطو کې نمانځل کېږي چې ښوونکي د ښځینه ښوونکو د شمېر د کمېدو او مسلکي زدهکړو او ملاتړ ته د اړتيا په ګډون له بېلابېلو ستونزو سره مخ دي.
تر دې وړاندې د ملګرو ملتونو ښوونيز، علمي او کلتوري سازمان (یونسکو) په یوه راپور کې خبرداری ورکړی و چې د افغانستان د هلکانو په ښوونځیو کې د ښځینه ښوونکو پر تدریس بندیز د ښوونکو کمښت لا پسې زیات کړی دی.
د یونسکو په وینا، د افغانستان په ښوونځیو کې د ښځینه ښوونکو د شمېر کمېدل د ټولو زدهکوونکو د زدهکړو کیفیت کمزوری کوي.
