۸صبح، کابل: د خوړو نړیوال پروګرام وايي چې د افغانستان په بېلابېلو سیمو کې د سېلابونو د مدیریت لپاره سلګونه متره استنادي دیوالونه د دې لامل شوي چې کلیوالې ټولنې د ویجاړونکو سېلابونو له زیانونو خوندي پاتې شي.
ملګرو ملتونو پنجشنبه د غويي پر ۱۷مه په یوه راپور کې ویلي چې د خوړو نړیوال پروګرام افغان کلیوالو ټولنو ته د سېلابونو پر وړاندې د مبارزې لپاره استنادي دیوالونه جوړ کړي چې دې چارې د اوبو لګولو کانالونو په خوندیتوب، د خاورینو بندونو په ټينګښت او د اوبو حوزو په مدیریت کې مرسته کړې ده.
په راپور کې د ځايي خلکو په همکارۍ د هرات په زاول، د فاریاب په پښتونکوټ، د جوزجان په درزاب، د سمنګان په ایبک، د سرپل په سوزمه کلا او د خوست په تریزي ولسوالیو کې د سېلابونو پر وړاندې د ټولټال ۷۷۶ مترو محافظتي دیوالونو د جوړېدو خبر ورکړل شوی دی.
راپور زیاته کړې چې په دغو سیمو کې استنادي دېوالونو لسګونه کورنۍ او سلګونه هکټاره کرنیزه ځمکه د ویجاړوونکو سېلابونو له ګواښ څخه خوندي کړې ده.
د راپور له مخې، افغانستان له هغو هېوادونو دی چې د اقلیمي بدلونونو پر وړاندې تر ټولو ډېر زیانمنونکی ګڼل کېږي او په دوامداره توګه له وچکالۍ، سېلابونو، سختې ګرمۍ او د خوړو د خوندیتوب پر وړاندې له مخ پر زیاتېدونکو ګواښونو سره مخ دی.
په راپور کې راغلي چې د خوړو نړیوال پروګرام د خپلو پراختیايي پروژو له لارې له هغو ټولنو سره مرسته کوي چې دا څرخ مات کړي او مخکې له مخکې د غمیزې له رامنځته کېدو مخنیوی وکړي.
د خوړو نړیوال پروګرام ټینګار کړی چې اوسمهال شدید بارانونه د بهېدو پر ځای په ځمکه کې جذبېږي او دا د ناڅاپي سېلابونو خطر راکموي.
په افغانستان کې هر کال موسمي ویجاړوونکي سېلابونه د هېواد په بېلابېلو سیمو کې لسګونه کسانو ته مرګژوبله اړوي او زرګونه هکټاره کرنیزه ځمکه او سلګونه د استوګنې کورونه ویجاړوي.
