۸صبح، کابل: د ملګرو ملتونو د وګړو صندوق (UNFPA) وايي چې پر ځوانانو پانګونه او ترې ملاتړ به د افغانستان لپاره د غوره راتلونکې له جوړولو سره مرسته وکړي.
نوموړي سازمان یکشنبه د چنګاښ پر ۲۱مه په خواله شبکې اېکس کې لیکلي چې د روغتیايي او ښوونیزو خدماتو له لارې له افغان ځوانانو او تنکي ځوانانو ملاتړ د هغوی له ودې سره مرسته کوي.
ملګرو ملتونو زیاته کړې چې ځوانانو ته د روغتیايي خدماتو برابرول، د ژوند مهارتونو زدهکړې او د فرصتونو رامنځته کول، هغوی ته د خوندي او ګټور ژوند زمینه برابروي.
نوموړي بنسټ ټینګار کړی، ځوانان که چېرته مناسب فرصتونه ولري، کولی شي په خپلو ټولنو کې اغېزناک رول ولوبوي.
دا په داسې حال کې ده چې په افغانستان کې ګڼ ځوانان، په ځانګړې توګه نجونې له بېبرخلیکه راتلونکې سره مخ دي.
