۸صبح، کابل: ملګرو ملتونو د افغانستان د اقتصادي او ټولنیز وضعیت په تړاو په یوه راپور کې ویلي چې په دغه هېواد کې د ښځو او نجونو وضعیت لا هم خراب دی.
د ملګرو ملتونو پراختیايي پروګرام (UNDP) د دوشنبه د چنګاښ پر ۱۵مه، پر خپله اېکسپاڼه لیکلي چې دا راپور له ۲۰۲۴ کاله د ۲۰۲۵ کال تر پایه د افغانستان وضعیت ارزوي.
د راپور له مخې، په ۲۰۲۵ کال کې د ښځو پر زدهکړو، کار، تګراتګ او عامه ژوند ته پر لاسرسي لګېدلي محدودیتونه لا زیات شوي او د هېواد د بشري ظرفیتونو کمښت یې نور هم ژور کړی دی.
په راپور کې راغلي چې افغانستان لا هم د نړۍ یوازینی هېواد دی چې نجونې پکې له منځنیو او لوړو زدهکړو محرومې دي.
ملګرو ملتونو ټینګار کړی چې دغه محدودیتونه د کار ځواک کموي او د هېواد راتلونکی اقتصادي ظرفیت زیانمنوي.
د ملګرو ملتونو پراختیايي پروګرام زیاته کړې چې د طالبانو محدودیتونو ښځو ته د بنسټیزو خدمتونو وړاندې کول په ځانګړې توګه د روغتیا او زدهکړو په برخوکې کمزوري کړي دي.
په راپور کې راغلي: «له عامه او اقتصادي ژونده د ښځو دوامداره محرومیت، د افغانستان د اوږدمهالې بیارغونې او پراختیا پر وړاندې تر ټولو ستر خنډ دی.»
ملګرو ملتونو په دغه راپور کې چې په مې میاشتې کې بشپړ شوی، د افغانستان د اقتصاد، کډوالۍ، کارموندنې، طبیعي پېښو، سوداګرۍ، وچکالۍ، امنیت، معیشت او بېوزلۍ وضعیت هم ارزولی دی.
