۸صبح، کابل: د افغانستان لپاره د ملګرو ملتونو د سرمنشي ځانګړې استازې او د یوناما مشرې رباب فاطمې کندهار ته سفر کړی دی.
د روغتیا نړیوال سازمان دوشنبه د لړم پر ۲۵مه، ویلي چې فاطمې په دغه سفر کې د میرویس حوزوي روغتون د فېسټولا د درملنې له څانګې لیدنه کړې ده.
دغه څانګه د روغتیا نړیوال سازمان په ملاتړ پر فېسټولا ناروغۍ د اخته ښځو د درملنې خدمتونه وړاندې کوي.
فاطمې دغه راز له هغو ناروغانو سره خبرې یې کړې دي چې تر درملنې لاندې دي او له هغو ښځینه روغتیايي کارکوونکو سره یې هم کتلي چې تخصصي روغتیايي خدمتونه وړاندې کوي.
د روغتیا نړیوال سازمان د فېسټولا ناروغۍ د مخنیوي، درملنې او ترميم خدمتونو ته د ښځو د لاسرسي پر دوام ټینګار کړی دی.
دغه سازمان ویلي چې پر دې ناروغۍ اخته ښځې ډېری وخت د کلونو لپاره له درد، بدنامۍ او ټولنیزې انزوا سره مخ وي.






