۸صبح، کابل: د کډوالۍ نړیوال سازمان (IOM) ویلي چې د ننګرهار په خوګیاڼیو ولسوالۍ کې زرګونه زیانمنوونکې کورنۍ له پاکستانه تر راستنېدو او په افغانستان کې له بې ځایه کېدو وروسته د لومړنیو اړتیاوو د برابرولو په برخه کې له ستونزو سره مخ دي.
نوموړي بنسټ چهارشنبه د زمري پر ۲۸مه راپور ورکړی چې د دغو کورنیو ډېرې یې له طبیعي پېښو او اقتصادي ستونزو وروسته د امنیت او ثبات په موخه په خوګیاڼیو ولسوالۍ کې مېشتې شوې دي.
د راپور پر بنسټ، محدود کاري فرصتونه، بېوزلي، بېځایه کېدنه او بنسټیزو خدماتو ته محدود لاسرسی د دغو کورنیو ژوند له ستونزو سره مخ کړی دی.
نوموړي سازمان زیاته کړې چې دا کورنۍ خپلو ماشومانو ته د خوړو، سرپناه، روغتیايي پاملرنې او نورو بنسټیزو اړتیاوو د برابرولو په برخه کې له ننګونو سره مخ دي.
ملګرو ملتونو ویلي چې په سیمه کې یو ټولنیز مرکز دغو کورنیو ته د خدماتو پر مرکز بدل شوی او هره ورځ سلګونه کسان د بېلابېلو مرستو د ترلاسه کولو لپاره ورځي.
د دغه مرکز د ښځو په ځانګړې برخه کې رواني – ټولنیز ملاتړ، د مسلکي مهارتونو روزنه او ټولنیز فعالیتونه وړاندې کېږي او ښځې د اړتیا له مخې تخصصي خدماتو ته ورپېژندل کېږي.
