۸صبح، کابل: د ملګرو ملتونو د وګړو صندوق (UNFPA) وايي چې د امیندوارۍ او زېږون پر مهال روغتیايي خدماتو او تخصصي پاملرنې ته پر وخت لاسرسی د میندو او نویو زېږېدلو ماشومانو په ژغورلو کې مهمه ونډه لري.
نوموړي بنسټ سهشنبه د چنګاښ پر ۱۶مه راپور ورکړی چې د روغتیايي کارکوونکو چټکه پاملرنه او د زېږون پر مهال تخصصی روغتیايي خدماتو ته لاسرسی، میندو او نویو زېږېدلو ماشومانو ته د جدي ستونزو له رامنځته کېدو مخنیوی کولی شي.
د ملګرو ملتونو د وګړو صندوق زیاته کړې ده چې د امیندوارۍ پر مهال منظمې روغتیايي معاینې، د روغتیايي ستونزو ژر تشخیص او د روزل شویو روغتیاپالو شتون، په څرګند ډول عوارض او د مخنیوي وړ مړینې کمولی شي.
یاد سازمان ویلي چې په لرې پرتو سیمو کې روغتیايي مرکزونه د میندو او نویو زېږېدلو ماشومانو د روغتیا اړوند اړین خدمات وړاندې کوي، څو ښځې وکړای شي اړینو روغتیايي خدماتو ته لاسرسی ولري.
د ملګرو ملتونو د وګړو صندوق ټینګار کړی چې په لرې پرتو سیمو کې د امیندوارۍ او زېږون اړوند د تخصصي خدماتو پراخول، د خوندي زېږون د ډاډمنولو او د میندو او نویو زېږېدلو ماشومانو د مړینې د کچې د کمولو بنسټيز لاملونه دي.
