۸صبح، کابل: د ملګرو ملتونو پراختیايي پروګرام (UNDP) ویلي چې د ډېرو افغان ښځو لپاره په سوداګرۍ کې د فعالیت پیلول او کار د عاید ترلاسه کولو له پاتې محدودو لارو یوه ده.
نوموړي سازمان یکشنبه د چنګاښ پر ۲۸مه په خپاره کړي راپور کې د محدودیتونو له زیاتېدو سره هممهاله، په افغانستان کې د ښځو له خوا د رهبري کېدونکو سوداګریزو فعالیتونو پر پراختیا ټینګار کړی دی.
د ملګرو ملتونو پراختیايي پروګرام ویلي چې په افغانستان کې د ښځو تر مشرۍ لاندې له سوداګریزو فعالیتونو ملاتړ کوي، څو هغوی مالي سرچینو، بازار او ډیجیټلي وسایلو ته لاسرسی ومومي.
نوموړي سازمان پرون هم راپور ورکړی چې دا مهال څه باندې ۱۰ زره افغان ښځې د سوداګرې جواز لري او دا د تېرو پنځو کالو پرتله لس برابره ډېروالی ښيي.
