۸صبح، کندوز: د ملګرو ملتونو پراختیايي پروګرام (UNDP) خبر ورکړی چې په کندوز کې د ناچاوده مهماتو د پاکولو او د ماینونو په اړه د خلکو د پوهاوي لوړولو په موخه هڅې دوام لري.
د دغه پروګرام استازي تورهان صالح یکشنبه د تلې پر ۱۲مه ویلي چې په کندوز کې ناچاوده مهمات لا هم جدي ننګونه ده او د پاکولو لپاره یې ډېرو اقداماتو ته اړتیا ده.
نوموړي زیاته کړې چې د دغه پلان په چوکاټ پر ناچاوده توکو ککړې سیمې پاکېږي او د رامنځته کېدونکو ګواښونو په اړه یې خلکو ته پوهاوی ورکول کېږي.
د صالح په خبره، د دغه پروګرام موخه په کندوز کې د خلکو لپاره د کار، ژوند او خوندي چاپېریال رامنځته کول دي.
دا پروګرام د کډوالۍ نړیوال پروګرام (IOM)، د کډوالو په چارو کې د ملګرو ملتونو عالي کمېشنرۍ (UNHCR)، د ملګرو ملتونو د بشري استوګنې پروګرام (UN-Habitat) او د افغانستان لپاره د ملګرو ملتونو د ځانګړي وجهي صندوق (UN STFA) په ملاتړ پلی کېږي.
د ملګرو ملتونو د موندنو له مخې، افغانستان په نړیواله کچه د ناچاوده توکو لوړ تلفات لري.
د دغه بنسټ په خبره، د روان میلادي کال له پیله تر اوسه د افغانستان په ختیځو سیمو کې له جګړو څخه پاتې ناچاوده توکو اړوند ۶۴ پېښې ثبت شوې چې له کبله یې ۶۴ ملکیانو ته مرګ ژوبله اوښتې ده.
