۸صبح، کابل: د خوړو نړیوال سازمان (WFP) خبرداری ورکړی چې د بودیجې د کمښت له کبله په افغانستان کې د خوارځواکۍ کچه په زیاتېدو ده او د ژغورونکو خوراکي پروګرامونو کمښت ښايي په راتلونکو میاشتو کې زرګونه ماشومان له ګواښ سره مخ کړي.
نوموړي بنسټ سهشنبه د زمري پر ۱۳مه راپور ورکړی چې د افغانستان په درېیمې برخې ولایتونو کې د ماشومانو ترمنځ خوارځواکي بحراني کچې ته رسېدلې او د اټکل له مخې به تر اکتوبر میاشتې زیاته شي.
د راپور له مخې، هلمند، دایکندي، زابل، بغلان، روزګان، پکتیکا، نورستان، سرپل، غور، کندهار، فاریاب او لوګر د ماشومانو تر منځ د خوارځواکۍ له بحراني وضعیت سره مخ دي.
د خوړو نړیوال پروګرام زیاته کړې چې د ماشومانو د خوارځواکۍ کچه به د جولای له میاشتې تر اکتوبر پورې خپل اوج ته ورسېږي، خو سږ کال ډېرو ماشومانو ان د حاصلاتو د راټولولو په موسم کې هم اړین خواړه نه دي ترلاسه کړي.
نوموړي بنسټ ټینګار کړی چې د بېړنۍ بودیجې له برابرولو پرته به د خوارځواکۍ د درملنې او مخنیوي پروګرامونه لا محدود او ډېر ماشومان به له ګواښ سره مخ شي.
