۸صبح، کابل: د ملګرو ملتونو د وګړو صندوق (UNFPA) وايي چې د افغانستان په ختیځ کې له وروستیو سېلابونو وروسته زرګونه کسان بېړنیو مرستو ته اړتیا لري او ښځو او نجونو ډېر زیان لیدلی دی.
نوموړي بنسټ یکشنبه د زمري پر ۴مه په خواله شبکې اېکس کې لیکلي چې ځپل شویو ته بېړني خدمات، د اړتیا وړ تجهیزات او رواني – ټولنیز ملاتړ برابروي.
د ملګرو ملتونو د وګړو صندوق زیاته کړې چې هڅه کوي سېلاب ځپلي او میندې حیاتي خدماتو ته لاسرسی ولري.
څو ورځې مخکې په نورستان کې سېلابونو د ځاني زیان ترڅنګ پراخ مالي زیانونه هم اړولي او بشري مرستو ته یې اړتیا زیاته کړې ده.
د طالبانو مرستیال ویاند حمدالله فطرت خبر ورکړی و چې د نورستان په مرکز پارون او شاوخوا سیمو کې د راغلو سېلابونو له کبله ۲۴ کسان مړه او ۸۵ نور ټپيان شوي دي.
