۸صبح، کابل: په افغانستان کې د ملګرو ملتونو د مرستندوی پلاوي دفتر (یوناما) په یوه راپور کې ویلي چې له ۲۰۰۹ تر ۲۰۲۱ میلادي کلونو پورې په افغانستان کې په وسلهوالو نښتو کې تر ۴۰ زرو ډېر کسان وژل شوي او له ۷۷ زرو ډېر نور ټپیان شوي دي.
یوناما سه شنبه د وږي پر ۱۰مه، په افغانستان کې د تاوتریخوالي، وسلهوالو نښتو او کړکېچونو په اړه یو څېړنیز راپور خپور کړی دی.
یوناما ویلي چې دغه راپور له ۲۰۰۱ میلادي کاله په ۲۰۲۱ کال کې د طالبانو تر بیا واکمنېدو پورې مودې ته کتنه کوي.
ملګرو ملتونو زیاته کړې چې دغه راپور له ۱۹۵ هغو قربانیانو او د هغوی له کورنیو سره د مرکو پر بنسټ چمتو شوی چې په وسلهوالو نښتو کې زیانمن شوي، همداراز له ۲۳ نادولتي سازمانونو او ۲۳ دولتي چارواکو سره هم مرکې شوې دي.
د دې ادارې په وینا، نږدې ټولو مرکه شویو کسانو د عاطفي یا رواني زیانونو یادونه کړې چې خپګان، اندېښنه، د تېرو پېښو ناڅاپي ور په یادېدل او د رواني ټراما نورې نښې پکې شاملې دي.
دا په داسې حال کې ده چې له نیمايي ډېرو مرکه شویو کسانو ویلي چې د وسلهوالو نښتو له امله له جسمي پلوه زیانمن شوي او ډېری یې لا هم له دوامدارو دردونو کړېږي.
