۸صبح، کابل: په افغانستان کې د ملګرو ملتونو مرستندویه ماموریت (یوناما) ویلي چې په افغانستان کې د څو لسیزو جګړو قربانیان لا هم له ژورو جسمي، رواني، ټولنیزو او اقتصادي پایلو کړېږي او ډېر یې عدالت او ملاتړ ته اړین لاسرسی نه لري.
یوناما سهشنبه د وږي پر ۱۰مه راپور ورکړی چې په دغه راپور کې تر ډېره له ۲۰۰۱ کال څخه د ۲۰۲۱ کال د اګست تر پنځلسمې پېښې ارزول شوې دي.
د راپور له مخې، ۹۵ سلنه کسانو چې مرکه ورسره شوې، ویلي چې د نښتو له کبله له عاطفي یا رواني ستونزو لکه خپګان، اضطراب او تروما پورې اړوند خاطرو ته له ناڅاپي ورتګ سره مخ شوي دي.
همدارنګه ۵۸ سلنه کسانو ویلي چې د وسلهوالو شخړو پر مهال یې جسمي زیانونه لیدلي او ډېر یې لا هم د ټپونو له دوامدارو دردونو یا معلولیت سره مخ دي.
قربانیانو ویلي چې د درملنې د لګښتونو، د ویجاړو شویو کورونو د بیارغونې او د خپلو کورنیو د اړتیاوو د پوره کولو وس نه لري.
هغه ښځې چې د جګړو له کبله کونډې شوې، له اقتصادي ستونزو سره مخ دي او لګېدلو محدودیتونو ورته د کار زمینه ستونزمنه کړې ده.
یوناما ویلي چې څه باندې نیمايي هغو کسانو چې مرکې ورسره شوې، عدالت ته د لاسرسي، د تاوان یا خپلو حقونو د بېرته ترلاسه کولو لپاره یې هېڅ اقدام نه دی کړی، ځکه اندېښنه یې لرله چې شکایتونو ته به یې پام ونه شي یا له غچ اخیستلو وېرېدل.
