۸صبح، کابل: د ملګرو ملتونو ښوونیز، علمي او کلتوري سازمان (یونیسکو) ویلي چې د افغانستان د نړیوال میراث جام څلي د بیارغونې او خوندیتوب په موخه هڅې کوي.
نوموړي سازمان یکشنبه د تلې پر ۱۹مه په خپله فیسبوکپاڼه کې لیکلي چې د الیف (ALIPH) بنسټ په مالي ملاتړ یې د جام څلي د وضعیت د څار، د سېلابونو له امله د رامنځته کېدونکو خطرونو د کمولو او د دغه تاریخي اثر د اوږدمهاله ساتنې لپاره ګامونه اخیستي دي.
د یونیسکو په خبره، د ثبت شویو معلوماتو منظمه ارزونه له کارپوهانو سره مرسته کوي چې د منار ودانیز وضعیت وارزوي او د خوندیتوب لپاره یې پلان جوړ کړي.
یونیسکو ویلي چې د یوه پله په بشپړېدو سره جام څلي ته لاسرسی غوره شوی دی.
دا پل د ملي او نړیوالو متخصصانو په همکارۍ رغول شوی او د بېړنیو اقداماتو او د سیمې د اوسېدونکو لپاره د خوندي تګ راتګ زمینه برابروي.
د دغه بنسټ په خبره، د اغا خان بنسټ د الیف بنسټ په مالي ملاتړ داسې اقدامات پیل کړي چې موخه یې د جام څلي د ټینګښت او ثبات پیاوړتیا او د دغه تاریخي اثر اوږدمهاله ساتنه ده.
یونیسکو ټینګار کړی چې د جام څلي ساتنه د افغانستان د کلتوري میراث د خوندي کولو او راتلونکو نسلونو ته یې د لېږدولو مانا لري.
