۸صبح، کابل: د ملګرو ملتونو ښوونیز، علمي او کلتوري سازمان (یونیسکو) ویلي چې په افغانستان کې څه باندې دوه میلیونه نجونې منځنیو ښوونځيو ته له تګه محرومې دي.
نوموړي بنسټ چهارشنبه د وږي پر ۱۱مه په اېکس کې لیکلي چې یونیسکو پر افغانستان د طالبانو له واکمنېدو پنځه کاله وروسته هم له ښوونیزو فرصتونو ملاتړ ته دوام ورکوي.
یونسکو ویلي چې د «EERA» پروژې په بامیان او نورستان کې د سواد زدهکړو او مهارتونو د زدهکړې ټولګیو په جوړولو د زدهکړو بهیر له دوام سره مرسته کوي.
د یاد سازمان په خبره، د بامیان او نورستان په ۱۰ ولسوالیو کې څه باندې دوو زرو کسانو په دغو ټولګیو کې نوملیکنه کړې ده.
یونسکو زیاته کړې چې د دغو غوښتنوالو نږدې ۷۰ سلنه یې ښځې او نجونې دي.
د ملګرو ملتونو علمي، ښوونیز او کلتوري سازمان ټینګار کړی چې د ښوونې او روزنې هر فرصت ارزښت لري.
