۸صبح، کابل: د ملګرو ملتونو، کلتوري، علمي او ښوونیز سازمان (یونسکو) اعلان کړی چې د کمالالدین بهزاد د میناتورۍ سبک د افغانستان د ناملموس کلتوري میراث په توګه د نړیوال میراث په نوملړ کې ثبت شوی دی.
نوموړي سازمان سهشنبه د لیندۍ پر ۱۸مه ویلي چې د میناتورۍ هنر، د افغاني ټولنې کلتوري هویت او یووالی خوندي کړی او له ټولنیز انسجام او متقابل درناوي سره مرسته کوي.
یونسکو ویلي چې ګڼو هنرمندانو او هنري مرکزونو د کمالالدین بهزاد د اثارو له سبک څخه الهام اخیستی او هغه ته د اصلي الګو په سترګه ګوري.
نوموړي سازمان زیاته کړې ځینې هنرمندان، لکه بهزاد د دغه هنر په پېژندنه او محبوبیت کې مهم رول لوبولی او اثار یې اوس په نړیوالو مشهورو موزیمونو کې نندارې ته وړاندې کېږي.
د راپور په حواله، میناتوري د تاریخي او ادبي صحنو دقیقه سیمبولیکه بڼه ده.
کمالالدین بهزاد د هرات د میناتورۍ مکتب له سترو استادانو څخه و چې په نقاشۍ کې یې نوښتونه، په ځانګړي ډول د جزئیاتو، احساساتو او واقعگرایۍ په انځورولو کې شهرت درلود او د تیموریانو د سلطنت پر مهال یې فعالیت کاوه.
