د ملګرو ملتونو ښوونیز، علمي او کلتوري سازمان (یونیسکو) وايي چې ځوانان په نړۍ کې د ژبنۍ تنوع اصلي ساتونکي دي او د شاوخوا اوو زرو وینايي او اشارهیې ژبو د ژوندي ساتلو په برخه کې کلیدي ونډه لري.
نوموړي سازمان شنبه د فبرورۍ پر ۲۱مه ویلي چې له ژبنۍ تنوع سره بلدتیا دې له ماشومتوبه پیل او د ښوونې له لارې پرمخ یوړل شي.
یونیسکو ټینګار کړی چې له همدې کبله، سږکال «د مورنیو ژبو نړیوالې ورځې» موضوع چې د بنګلهدېش په نوښت یې بنسټ ایښودل شوی، «په څو ژبو زدهکړو کې د ځوانانو غږ» په نوم ټاکل شوې ده.
یونیسکو د خپل تازه راپور «ژبې ارزښت لري» ته په اشارې ویلي چې پر مورنۍ ژبې زدهکړې د تعلیمي بریا، ځانباورۍ او د نویو ژبو د زده کولو وړتیا پیاوړې کوي.
د ملګرو ملتونو ښوونیز، علمي او کلتوري سازمان زیاته کړې چې د نړۍ ۴۰ سلنه ماشومان اړ دي چې پر داسې ژبې زدهکړې وکړي چې په کور کې یې نه وايي.
دغه نړیوال بنسټ ټینګار کړی چې د ژبو پر انتقال پانګونه او په تعلیمي پروګرامونو کې د ځوانانو ګډون د ژبنۍ تنوع د خوندیتوب لپاره اړین دي.
یونیسکو ویلي چې ژبنۍ تنوع د سولې او انساني کرامت بنسټ ګڼل کېږي او د بشریت له ګډ روایت څخه دې هېڅ غږ نه حذفېږي.
