۸صبح، کابل: د ملګرو ملتونو د ماشومانو د ملاتړ صندوق (یونیسف) وايي چې پر خوارځواکۍ اخته ماشومانو ته تیار درملیز خواړه ورکوي.
نوموړي سازمان چهارشنبه د چنګاښ پر ۳۱مه په اېکس کې لیکلي چې دا مرستې د اروپايي ټولنې د بشردوستانه مرستو بنسټ په ملاتړ چمتو شوې او موخه یې د ماشومانو ترمنځ له خوارځواکۍ سره مبارزه ده.
یونیسف ویلي چې تیار درملیز خواړه کولی شي پر شدیدې خوارځواکۍ له اخته ماشومانو سره مرسته وکړي چې په کمه موده کې یې روغتیايي وضعیت او وزن ښه شي.
یونیسف داسې مهال د دغو مرستو پر دوام ټينګار کوي چې په افغانستان کې ګڼ ماشومان د خوارځواکۍ له ګواښ سره مخ دي.
د بریتانیا د بهرنیو چارو وزارت مرستیال هم ویلي و چې په افغانستان کې ۱۷.۴ میلیونه کسان د خوړو له ناامنۍ سره مخ دي او دا هېواد لا هم په نړۍ کې د ماشومانو او میندو د خوارځواکۍ لوړه کچه لري.
