۸صبح، کابل: د ملګرو ملتونو د ماشومانو د ملاتړ صندوق (یونیسف) وايي چې د همکارو بنسټونو په ملاتړ، د افغانستان په ګوټ ګوټ کې روغتونونو ته واکسینونه، یخچالونه او اړین تجهیزات برابروي.
نوموړي بنسټ سهشنبه د تلې پر ۷مه په اېکس پاڼه کې لیکلي چې د هرات په یوه کلینیک کې روغتیايي کارکوونکي د ماشومانو د واکسیناسیون لپاره تیاری نیسي.
یونیسف زیاته کړې چې دا تجهیزات په افغانستان کې د روغتیايي مرکزونو له لارې د واکسینونو د خوندیتوب او لېږد د مرستې لپاره برابرېږي.
دا سازمان وايي چې روغتیاپالان د واکسیناسیون خدماتو په وړاندې کولو، د ماشومانو د هغو ناروغیو پر وړاندې چې د مخنیوي وړ دي، په خوندیتوب کې مهم رول لري.
یونیسف واکسینونو او اړینو تجهیزاتو ته د لاسرسي پر ارزښت د ټينګار ترڅنګ، د واکسیناسیون خدماتو دوام اړین بللی دی.
