د ملګرو ملتونو له ماشومانو د ملاتړ صندوق (یونیسف) د نایجریا په شماللویدیځ ماګا سیمه کې د نجونو پر ښوونځي شوی برید غندلی دی.
یونیسف سهشنبه د نومبر پر ۱۸مه په یوې اعلامیې کې خبرداری ورکړی چې د دا ډول پېښو تکرار له ماشومانو او ښوونیزو مرکزونو د خوندیتوب بېړنۍ اړتیا برجسته کوي.
په اعلامیې کې راغلي، دا پېښه ښيي چې ماشومان، ښوونځي او ښوونیز کارکوونکي له هر وخته ډېر ملاتړ ته اړتیا لري څو وکړای شي په خوندي چاپېریال کې درس ووايي.
یونیسف د تښتول شویو نجونو د سملاسي ازادېدو غوښتنه کړې ده.
نوموړي بنسټ ټينګار کړی چې د نړیوالو قوانینو له مخې، پر ښوونځيو او زدهکوونکو هر ډول برید منع دی او د دا ډول پېښو عاملین دې د ملي او نړیوالو قوانینو له مخې ځواب ویلو ته راوکاږل شي.
د ملګرو ملتونو دغه بنسټ یادونه کړې چې په ۲۰۱۵ کال کې د نایجریا حکومت د «خوندي ښوونځيو اعلامیه» لاسلیک کړه؛ داسې سند چې موخه یې د ښوونیزو مرکزونو غیرنظامي ماهیت ساتل دي او د جګړو پر مهال ماشومانو ته د خوندي زدهکړو لاسرسی ډاډمنوي.
یونیسف له حکومت او نورو مسوولو بنسټونو غوښتي چې د کړیو ژمنو د پلي کولو لپاره خپلې هڅې ډېرې کړې.
یاد بنسټ ویلي چې له حکومت، مدني او محلي ټولنو سره په ګډه کار کوي، څو د ماشومانو د ملاتړ سیستمونه پیاوړي کړي او خوندي او ټولګډونی تعلیمي چاپېریالونه رامنځته کړي؛ خو ټینګار یې کړی چې دا سیستمونه دې لا ډېر پیاوړي شي، څو د ورته غمیزو له تکراره مخنیوی وشي.
په اعلامیې کې راغلي: «د زدهکړو پر مهال دې هېڅ ماشوم له ګواښ سره نه مخامخېږي.»
د یادونې ده چې وسلهوالو د نایجریا شماللویدیځ په «ماګا» ښار کې د نجونو پر یوې لیلیې برید کړی او ۲۵ زدهکوونکې نجونې یې تښتولې دي.
