۸صبح، کابل: د ملګرو ملتونو د ماشومانو د ملاتړ صندوق (یونیسف) وايي چې له پاکستان او ایران څخه په پراخه کچه د افغانانو راستنېدو، د پولو په اوږدو کې پر مرکزونو، کوربه ټولنو او پر لومړنیو خدماتو پراخ فشار راوستی دی.
نوموړي سازمان دوشنبه د وږي پر ۲۳مه راپور ورکړی چې له ۲۰۲۳ کاله تر اوسه له ایران او پاکستانه څه باندې ۶.۴ میلیونه افغانان راستانه شوي دي.
د راپور له مخې، یوازې د ۲۰۲۶ کال تر جولای پورې شاوخوا ۱.۸ میلیونه افغانان هېواد ته راستانه شوي چې له ډلې یې څه باندې ۶۵۲ زره له پاکستانه او شاوخوا ۴۲۵ زره له ایرانه راغلي دي.
یونیسف ویلي چې په دغو کې ۴۱۳ زره یې ایستل شوي او نیمايي یې ښځې او ماشومان دي.
دغه بنسټ خبرداری ورکړی چې ډېر راستنېدونکي د ژوند له اصلي ټاټوبي سره کمه اړیکه لري او ښايي بیا له بېوزلۍ او بې ځایه کېدو سره مخ شي.
یوازې په جولای کې څه باندې ۱۲۰ زره کسان د تورخم، میلک، سپین بولدک او بهرامچې له دروازو هېواد ته راننوتي دي.
یونیسف ویلي چې په افغانستان کې لا هم د خوړو امنیت او خوارځواکي اندېښمنونکې ده او شاوخوا ۱۷.۴ میلیونه کسان بېړنیو خوراکي مرستو ته اړتیا لري.
د دغه سازمان د اټکل له مخې، په ۲۰۲۶ کال کې به شاوخوا ۴.۹ میلیونه ښځې او ماشومان د خوارځواکۍ درملنې ته اړتیا ولري چې له ډلې یې شاوخوا ۳.۷ میلیونه له پنځو کالو کم عمره ماشومان دي.
