۸صبح، کابل: په افغانستان کې د ملګرو ملتونو د ماشومانو د ملاتړ صندوق (یونیسف) استازي تاجالدین اویوالي ویلي چې له ۲۰۲۳ کال څخه تر اوسه څه باندې ۶.۴ میلیونه افغانان خپل هېواد ته ستانه شوي دي.
اویوالي پنجشنبه د وږي پر ۱۹مه په اېکس پاڼه کې لیکي چې تورخم ته نږدې په عمري کمپ کې د بېرته راستنېدونکو افغانانو، په ځانګړې توګه د ماشومانو لپاره د یونیسف د دوامداره ملاتړ شاهد و.
د نوموړي په خبره، یونیسف راستنېدونکو ته اړین خدمات وړاندې کوي او له ماشومانو ملاتړ ته هم ځانګړې پاملرنه لري.
اویوالي زیاته کړې چې د څه باندې ۶.۴ میلیونو افغانانو بېرته راستنېدو د افغانستان پر بنسټیزو خدماتو فشار زیات کړی؛ هغه چې له دې وړاندې هم له محدودیتونو او د سرچینو له کمښت سره مخ و.
په وروستیو میاشتو کې له ګاونډیو هېوادونو د افغانانو د راستنېدو شمېر زیات شوی او ډېر راستنېدونکي د تورخم، اسلامکلا او سپین بولدک له لارې هېواد ته راځي.
