۸صبح، کابل: د ملګرو ملتونو د ماشومانو د ملاتړ صندوق (یونیسف) اعلان کړی چې د افغانستان په ختیځ او مرکز کې د وروستیو سېلابونو په پایله کې څه باندې دوه زره او ۴۰۰ کسان اغېزمن شوي دي.
نوموړي بنسټ چهارشنبه د زمري پر ۲۱مه راپور ورکړی چې د افغانستان په څو ولایتونو کې بارانونو او ناڅاپي سېلابونو، کورونو او زېربناوو ته زیان اړولی او بنسټيز خدمات یې ګډوډ کړي دي.
یونیسف ویلي چې دا سېلابونه د جولای پر ۲۰مه د افغانستان په ځينو مرکزي، شمالي او ختیځو ولایتونو کې راوتلي او ځاني زیانونه یې هم اړولي دي.
د نورستان پارون ولسوالۍ ډېره ځپل شوې او د لومړنیو راپورونو له مخې، ۲۴ کسان مړه او ۱۲۵ نور ټپيان شوي دي.
په دغو سېلابونو کې ۱۲۰ کورونه نړېدلي یا اغېزمن شوي او روغتیايي مرکزونو، سیمهییزو بازارونو، پلونو، سړکونو، محافظتي دیوالونو، کرنیزو ځمکو او د اوبو رسولو شبکو ته یې زیان رسولی دی.
نوموړي سازمان ویلي چې یونیسف او شریکان یې سېلاب ځپلو ته اړین روغتیايي خدمات، د څښاک پاکې اوبه، روغتیايي توکي او له ماشومانو ملاتړي خدمات وړاندې کوي.
