۸صبح، کابل: د ملګرو ملتونو د ماشومانو د ملاتړ صندوق (یونیسف) ویلي چې په افغانستان کې ۸.۸ میلیونه ماشومان له اقلیمي ګواښونو سره مخ دي.
یونیسف سهشنبه د غبرګولي پر ۲۶مه راپور ورکړی چې په افغانستان کې له شاوخوا ۲۱ میلیونو ماشومانو څخه ۸.۸ میلیونه چې د ټولو ماشومانو ۴۱ سلنه جوړوي، په یو وخت کې له لږ تر لږه درېیو اقلیمي ګواښونو سره مخ دي.
د راپور له مخې، سېلابونه، وچکالي، د تودوخې څپې، سخته ګرمي او د شګو او دوړو توپانونه هغه مهم ګواښونه دي چې افغان ماشومان اغېزمنوي.
یونیسف زیاته کړې چې افغانستان د اقلیمي بدلونونو پر وړاندې د ماشومانو د زیانمنېدو له پلوه د سویلي اسیا هېوادونو په منځ کې لوړ ځای لري.
یاد بنسټ ویلي چې د هېواد څه باندې ۷۵ سلنه ماشومان د وچکالۍ له ګواښ سره مخ دي، تر نیمايي زیات یې د تودوخې له اوږدمهالې څپې سره لاس او ګریوان دي او څه د پاسه ۱.۷ میلیونه نور د سېلابونو له کبله زیان ویني.
یونیسف خبرداری ورکړی چې په افغانستان کې شدیدې خوارځواکۍ د اقلیمي بحران پایلې سختې کړې او روان کال به تر پنځو کالو کم عمره میلیونونه ماشومان د خوارځواکۍ درملنې ته اړتیا ولري.
