۸صبح، کابل: د ملګرو ملتونو د ماشومانو د ملاتړ صندوق (یونیسف) ویلي چې د ۲۰۲۶ کال په جولای میاشت کې د افغانستان په ګوټ ګوټ کې د ښځو او ماشومانو په ګډون څه باندې شپږو میلیونو کسانو ته اړین روغتیايي خدمات وړاندې شوې دي.
دغه بنسټ دوشنبه د وږي پر ۲۳مه راپور ورکړی چې دا خدمات په سېلابځپلو، زلزلهځپلو او هغو سیمو کې چې د ناروغیو له خپرېدو او جبري راستنېدو له کبله یې اغېزمنې شوې، وړاندې شوې دي.
یونیسف ویلي چې افغانستان د ۲۰۲۶ کال په جولای میاشت کې له پرلپسې طبیعي پېښو، په پراخه کچه د کډوالو له راستنېدو، د خوړو شدیدې ناامنۍ، خوارځواکۍ، د ناروغیو خپرېدو، اقتصادي فشارونو او بنسټيزو خدماتو ته د لاسرسي په برخه کې له محدودیتونو سره مخ و.
د یونیسف د اټکل له مخې، په ۲۰۲۶ کال کې به په افغانستان کې د ۱۱.۶ میلیونو ماشومانو په ګډون شاوخوا ۲۱.۹ میلیونه کسان بشردوستانه مرستو ته اړتیا ولري.
دغه سازمان زیاته کړې چې ښځې او نجونې لا هم د هغو محدودیتونو له امله په ځانګړې توګه زیانمنې پاتې دي چې زدهکړو، کار، عام ژوند او بنسټیزو خدماتو ته یې پر لاسرسي اغېز کوي.
یونیسف ټینګار کړی چې د روغتیايي خدماتو وړاندې کول او د زیانمنونکو ماشومانو او کورنیو ملاتړ، په ځانګړې توګه هغو سیمو کې چې د طبیعي پېښو او د کډوالو له بېرته راستنېدو څخه اغېزمنې شوې، په افغانستان کې مهمه بشردوستانه اړتیا ده.
