۸صبح، کابل: د ملګرو ملتونو د ماشومانو د ملاتړ صندوق (یونیسف) ویلي چې د روټري نړیوال سازمان په ملاتړ هڅه کوي، د افغانستان ټول ماشومان د پولیو پر ضد واکسین شي.
یونیسف سه شنبه د لړم پر ۵مه، پر اېکس پاڼه لیکلي چې هر ماشوم حق لري روغ او د پولیو پر ناروغۍ د اخته کېدو له خطره خوندي لوی شي.
دغه بنسټ زیاته کړې چې د روټري نړیوال سازمان په همکارۍ هڅه کوي، د پولیو واکسین له لارې ماشومان له دې ناروغۍ وژغوري.
افغانستان او پاکستان د نړۍ له هغو لږو هېوادونو دي چې د پولیو ویروس پکې لا هم په بشپړه توګه له منځه نه دی تللی.
د روغتیا نړیوال سازمان څو ورځې وړاندې په یوه راپور کې په افغانستان کې د پولیو د شپږو نویو پېښو د ثبتېدو خبر ورکړی و.
دغه راپور له مخې، د ۲۰۲۶ کال له پیل راهیسې په هېواد کې پر دې ویروس د اخته کېدو ۴۲ پېښې ثبت شوې دي.
