۸صبح، کابل: په افغانستان کې د ملګرو ملتونو د ماشومانو ملاتړ صندوق (یونیسف) او د دغه بنسټ همکارانو ویلي، چې د افغانستان په ختیځ کې له وروستیو سېلابونو وروسته یې په نورستان ولایت کې د اوبو د رسولو یو لنډمهالی سیسټم جوړ کړی دی.
یونیسف دوشنبه د زمري پر ۱۲مه، پر خپله اېکسپاڼه ویلي، چې دغه سيسټم د ۶۰ زره لېټره اوبو ظرفیت لري او د دوو زرو کسانو لپاره د څښاک د پاکو اوبو د برابرولو په موخه جوړ شوی دی.
دغه بنسټ ویلي، چې وروستیو سېلابونو د افغانستان د ختیځ څو ولایتونه اغېزمن کړي دي.
یونیسف زیاته کړې، چې په بېړنیو حالاتو کې د څښاک پاکو اوبو ته لاسرسی ځانګړی اهمیت لري.
افغانستان په وروستیو کلونو کې له طبیعي پېښو، لکه سېلابونو، وچکالۍ او اقلیمي بدلونونو سره مخ دی.
دغو پېښو، د زېربناوو د ویجاړېدو ترڅنګ، د ډېرو کورنیو لپاره د څښاک پاکو اوبو او لومړنیو خدمتونو ته لاسرسی هم ستونزمن کړی.
