۸صبح، کابل: د ملګرو ملتونو له ماشومانو د ملاتړ صندوق (یونیسف) ویلي چې په افغانستان کې د میندو او نویو زېږېدلو ماشومانو له روغتیا سره د مرستې په موخه امیندوارو ښځو ته خوراکي مکملونه ورکوي څو هغوی او ماشومان یې د خوندي ودې لپاره د اړتیا وړ مغذي مواد ترلاسه کړي.
یونیسف یکشنبه د چنګاښ پر ۲۸مه پر اېکس لیکلي چې دا پروګرام د ماشومانو د تغذيي صندوق «بزوس کورني بنسټ» په ملاتړ پلی کېږي.
نوموړي سازمان زیاته کړې چې میندې او نوي زېږېدلي ماشومان د امیندوارۍ له دورې څخه له یو بل سره تړاو لري او په دې موده کې د اړینو خوراکي موادو ترلاسه کول د دواړو روغتیا ته بنسټیز ارزښت لري.
یونیسف ټینګار کړی چې امیندواره ښځو ته د خوراکي مکملونو برابرول، په افغانستان کې د میندو او ماشومانو د تغذیې د ښه والي او د خوراکي موادو د کمښت له امله د رامنځته کېدونکو خطرونو د کمولو لپاره د دغه بنسټ د هڅو یوه برخه ده.
دا په داسې حال کې ده چې په افغانستان کې ځينې میندې او نوي زېږېدلي ماشومان اړینو خوراکي موادو او روغتیايي خدماتو ته محدود لاسرسی لري.
