۸صبح، کابل: په افغانستان کې د ملګرو ملتونو د ماشومانو د ملاتړ صندوق (یونیسف) استازي تاجالدین اویوالي ویلي چې د کندهار په میرویس روغتون کې د اکسیجن د تولید یوه فابریکه پرانېستل شوې ده.
اویوالي دوشنبه د چنګاښ پر ۲۲مه په خپله اېکس پاڼه کې لیکلي چې دا فابریکه کندهار ته د وروستي سفر په ترڅ کې د سویلي اسیا لپاره د یونیسف د سیمهییز مدیر سنجي ویجسکرا په ملتیا پرانیستل شوې ده.
نوموړي زیاته کړې چې دا فابریکه به د نوې زېږېدلو ماشومانو، کوچنیانو، میندو او د بېړنیو څانګو ناروغانو لپاره اړین طبي اکسیجن برابر کړي او په دغه روغتون کې به د روغتیايي خدماتو د وړاندې کولو وړتیا لوړه کړي.
د یادونې ده چې افغانستان لا هم په روغتیايي برخه کې له ګڼو ننګونو سره مخ دی.
د درملو، روغتیايي تجهیزاتو او مسلکي کارکوونکو کمښت، په ځانګړې توګه په لرې پرتو سیمو کې باکیفیته روغتیايي خدماتو ته د اړمنو وګړو لاسرسی محدود کړی دی.
