۸صبح، کابل: په افغانستان کې د ملګرو ملتونو د ماشومانو د ملاتړ صندوق (یونیسف) استازي تاجالدین اویوالې په هېواد کې د اوبو د ناورین د لا سختېدو خبر ورکړی دی.
هغه شنبه د لړم پر ۲۹مه، ویلي چې اقلیمي بدلونونه، د اوبو د تقاضا زیاتوالی، د بودیجې او بنسټیزو تاسیساتو کمښت، د اوبو له سرچینو له حده زیاته ګټه اخیستنه او د دغو سرچینو ناسم مدیریت د دې ناورین د سختېدو له مهمو لاملونو دي.
اویوالې زیاته کړې چې په افغانستان کې ماشومان او ټولنې د اوبو د ناورین له پایلو زیانمنېږي.
هغه د ملګرو ملتونو د غړو هېوادونو، مرستندويانو او نړیوالو مالي بنسټونو له استازو مننه کړې چې د افغانستان د اوبو د ناورین په اړه يې د یونیسف په معلوماتي غونډه کې ګډون کړی و.
په وروستیو کلونو کې د اوبو ناورین په افغانستان کې پر یوې جدي ننګونې بدل شوی او د اوبو سرچینو ته یې د خلکو لاسرسی ستونزمن کړی دی.
