۸صبح، پکتیا: په پکتیا کې ځايي سرچینې وايي چې ناڅرګندو کسانو د دغه ولایت په مرکز ګردیز ښار کې یو ځوان ډاکټر وژلی دی.
سرچینو یکشنبه د زمري پر ۱۸مه ۸صبح ورځپاڼې ته وویل چې دا پېښه نن د پکتیا حوزوي روغتون ته نږدې شوې ده.
د سرچینو په خبره، دا ډاکټر عبدالحنان نومېده او په پکتیا روغتون کې یې دنده لرله.
ورته مهال د پکتیا د امنیې قوماندانۍ ویاند منیب ځدراڼ هم د دې پېښې پخلی کړی دی.
ځدراڼ زیاته کړې چې یو ډاکټر د «بادي ټوپک» په ډزو وژل شوی او د بریدګر د نیولو هڅې روانې دي.
تر اوسه د دې پېښې انګیزه روښانه نه ده.
دا په داسې حال کې ده چې په دې وروستیو کې د هېواد په ځينو سیمو کې جنايي پېښې زیاتې شوې دي.
