۸صبح، کابل: د یما سیاوش ورور، بکتاش سیاوش چې د هغه د وژل کېدو د عدالت غوښتنې لپاره د «انلاین لاسلیکونو» راټولولو بهیر پیل کړی و، د لاسلیک ټولولو د پاڼې له هک کېدو خبر ورکوي.
هغه پر خپله فیسبوک پاڼه لیکلي چې د «سیاوش لپاره د عدالت» په نامه یې د لاسلیک راټولولو بهیر پاڼه څو ځله د هکرانو تر برید لاندې راغله او ځینو خلکو دې پاڼه ته لاره پیدا کړې ده.
بکتاش سیاوش زیاته کړې ده چې په دې بهیر کې یې د درېیو ورځو په ترڅ کې ۱۲ زره لاسلیکونه راټول کړي دي.
هغه ادعا کوي چې د افغانستان بانک مخکینی سرپرست، اجمل احمدي د یما سیاوش په وژل کېدو کې یو اصلي تورن دی.
سیاوش جوته کړې ده چې د پاڼې منځپانګې او لاسلیکونو ته د لاسرسي لپاره هڅې روانې دي او له نورو لارو به دا بهیر بیا په لاره واچول شی.
د «سیاوش لپاره عدالت » بهیر په لاره اچولو موخه نړیوالو معتبرو بنسټونو ته د افغانستان د اجمل احمدي په شان د مخکیني حکومت د مهمو چارواکو د لارې موندلو مخنیوی بلل شوی دی.
د طلوع نیوز پخواني خبریال یما سیاوش، چې د ژوند په وروستیو څو میاشتو کې د افغانستان بانک کارکوونکی و، یو کال مخکې یې په موټر کې د چاودنې له امله ووژل شو.
