۸صبح، کابل: د یما سیاوش کورنۍ امریکا کې له هاروارډ پوهنتونه غوښتنه کړې، چې دغه پوهنتون کې د افغانستان بانک پخواني رییس اجمل احمدي غړیتوب لغوه کړي.
د یماسیاوش ورور بکتاش سیاوش د جمعې پر ورځ د لړم پر یوویشتمه «یماسیاوش ته عدالت» تر نامه لاندې غوښتنلیک پر لاره اچولی دی.
دې غوښتنلیک کې له خلکو غوښتل شوي، چې دوه زره او ۵۰۰ لاسلیکه راټول کړي، ترڅو د امریکا هاروارډ پوهنتون کې د اجمل احمدي غړیتوب لغوه او محکمې ته یې وروپېژني.
نن تر غرمې پورې یو زر او ۷۰۰ کسانو دا غوښتنلیک لاسلیک کړې ده.
د یما سیاوش کورنۍ وايي، تمه کېږي د لاسلیک شمېر تر ۱۰ زرو پورې ورسېږي.
د سیاوش د کورنۍ په خبره، «هاروارډ پوهنتون دې د افغانستان پخواني حکومت جنایتکارانو» ته پناه نه ورکوي.
د سیاوش د کورنۍ غړي وایي، د هارورډ پوهنتون د لوړ پوړي غړي په توګه د اجمل احمدي ټاکل د نړیوال عدالت د ټینګښت لپاره د دغه پوهنتون له ارزښتونو سره ښکاره ټکر دی.
په غوښتنلیک کې ویل شوي، چې اجمل احمدي د مرکزي بانک د رییس په توګه د یما سیاوش د وژنې شواهدو د له منځه وړلو سره د عدالت د ټینګښت مخنیوی کړې و.
همدارنګه ویل شوي، چې اجمل احمدي د یما سیاوش د وژني د څرنګوالي په اړه خبریالانو ته معلومات نه ورکول.
د سیاوش کورنۍ د جرمونو نړیوالې محکمې او ملګرو ملتونو ته د یما سیاوش د وژنې قضیه لېږلې، چې هلته یې د اجمل احمدي «جنایت» په ګوته کړې ده.
یما سیاوش د طلوعنیوز پخوانۍ خبریال و او تېر کال یې تازه د افغانستان بانک کې دنده اخیستې وه، چې موټر کې یې د یو ځای پر ځای شوي ماین چاودنې له کبله ووژل شو.
پر کابل د طالبانو له واکمنۍ وروسته اجمل احمدي امریکا کې د هاروارډ پوهنتون غړیتوب اخیستی دی.
نوموړي له دې وړاندې دغه پوهنتون کې دوه ماسټریانې کړې دي.
نوموړی چې د اشرف غني د ورور زوم دی، له دې وړاندې هم د زورواکۍ، ناقانونه ګمارلو او ګوښه کولو او د مرکزي بانک له سرچینو پر ناسمې ګټې اخیستنې تورن دی.
له دې وړاندې طالبانو د نوموړي ۶.۵ میلیونه افغانۍ معاش کنګل کړ. احمدي د کابل له سقوط وروسته وتښتېد، لومړی متحده عربي اماراتو او له هغه ځایه بیا امریکا ته لاړ.
