ملګرو ملتونو ویلي چې د نړۍ ۴۰ سلنه وګړي پر خپلې مورنۍ ژبې له زدهکړو بېبرخې دي او دا د زدهکوونکو ښوونه او د هغوی وړتیاوې له ننګونو سره مخ کوي.
نوموړي سازمان شنبه د فبرورۍ پر ۲۱مه راپور ورکړی چې د ژبنۍ تنوع پر وړاندې ګواښ په چټکۍ زیاتېږي او هر کال ګڼې ژبې له منځه ځي.
یونیسکو هم راپور ورکړی چې د کلتوري او ژبنۍ تنوع خوندیتوب چې نورو ته درناوی رامنځته کوي، د دغه سازمان د سولې ماموریت د چوکاټ برخه ده.
د راپور له مخې، څوژبنۍ او څوکلتوري ټولنې د خپلو ژبو له لارې پېژندل کېږي او ژبې په پایداره توګه دودیزه پوهه او کلتور لېږدوي او خوندي کوي.
ملګرو ملتونو زیاته کړې چې په مورنۍ ژبه او څو ژبنۍ زدهکړو په برخه کې پرمختګ راغلی او ارزښت یې په ځانګړې توګه د زدهکړو په لومړیو کلونو کې پام وړ دی.
د یونیسکو د راپور له مخې، د مورنۍ ژبې نمانځنه د بنګلهدېش په نوښت نومول شوې او په ۱۹۹۹ کې همدغه ورځ د مورنۍ ژبې نړیواله ورځ ونوموله چې وروسته د دغه سازمان عمومي اسمبلۍ هم تصویب کړه.
